Пошта чытача. Лазня — месца, дзе можна эканоміць

Хачу выказаць свае думкі наконт Слуцкай лазні, дакладней аб тым, што кідаецца ў вочы пры яе наведванні.

Як ведаюць аматары пары, квіткі ў лазню каштуюць нятанна. У іх кошт укладаюцца затраты на электраэнергію, ваду, цяпло. Асабіста мне становіцца крыўдна, калі бачу, як з усіх кранаў у душы цячэ вада, нават калі там ніхто не мыецца. Людзі выходзяць з-пад душа, ваду не выключаюць, а на заўвагу могуць і паслаць.

Гэта ж колькі вады ўцякае ў каналізацыю?! Хто за яе плаціць?

На маю думку, атрыманыя грошы за квіткі ў лазню можна было б накіраваць на набыццё энерга- і рэсурсазберагаючых прыстасаванняў: водарассякаючых насадак на краны, сэнсарных датчыкаў уключэння і выключэння вады і святла. Такім чынам, можна было б знізіць кошт на лазню і эканоміць рэсурсы.

У далёкім 1975 годзе я быў у Югаславіі. Ужо тады санвузлы ва ўсіх гатэлях былі аўта­ма­тызаваныя: зайшоў пад душ — вада пацякла, выйшаў — выключылася. Таксама і з электрычна­сцю: пакуль знаходзішся ў санвузле — святло гарыць, выйшаў — патухла. Гэта, паўтаруся, я ба­чыў у тыя далёкія гады ў Югаславіі.

З тым, што праблема эканоміі ў лазні стаіць на першым месцы, пагаджаецца і яе кіраўніцтва. У размове мяне пераканалі, што ў будучым праблема будзе вырашацца. У сучасны мо­мант калектыў працуе над укараненнем энерга­зберагаючых лямп. А яшчэ прыемная навіна для случчан — у лазні будзе новы буфет з больш прымальнымі коштамі. Былы належаў «Слуцкгандлю» і быў занадта дарагі.