Актывіста Руху «За Свабоду» адпусцілі з ізалятара часовага ўтрымання Слуцкага РАУС вечарам 26 сакавіка.
Каардынатар Руху «За Свабоду» у Мінскай вобласці Віталь Амяльковіч быў затрыманы вечарам 24 сакавіка каля гандлёвага цэнтра «Маяк» супрацоўнікамі міліцыі ў штацкім.
Віталь распавёў карэспандэнту «Кур'ера», што яго абвінавачваюць у закліку да ўдзелу ў масавых мерапрыемствах, распаўсюджанага ў сацсетках. Суд запланаваны на сераду ў Слуцку.
У Слуцкім ізалятары часовага ўтрымання Віталь правёў два дні і дзве ночы. 24 сакавіка дома ў актывіста быў праведзены вобшук. Праваахоўнікі забралі ноутбук, тэлефон, сістэмны блок, плакат з надпісам «Слуцкі збройны чын», выявы з экс-кандыдатам у прэзідэнты Аляксандрам Мілінкевічам.
Сваякам і сябрам не дазволілі прынесці перадачы Віталю, пакуль яго ўтрымлівалі ў РАУС. Спачатку ў дзяжурнай частцы спаслаліся на тое, што ў выходныя перадачы не прымаюць, пасля на тое, што Віталя абвінавачваюць не па крымінальнай справе, а па адміністрацыйнай.
У ізалятары часовага ўтрымання Віталь Амяльковіч даведаўся, што для арыштаваных і затрыманых прывозяць ежу з рэстарацыі «Случ». Але меню, паводле актывіста, не рэстараннае. Напрыклад, у нядзелю на сняданак, абед і вячэру была пярлоўка з рыбнай катлетай.
У тэму: Случчанина Сержука Кийко задержали на Дне Воли в Минске
Як Дзень Волі стаў для случчанкі Цімошак Днём няволі. Рэпартаж
