Круглы стол у рэдакцыі «Кур'ера»: спрачаемся пра дробязі журналісцкай працы

Рэдакцыя «Кур'ера» у пятніцу, 22 студзеня, у межах планавай дзейнасці Асацыяцыі выдаўцоў рэгіянальнай прэсы «Аб'яднаныя МасМедыі» правяла чарговы круглы стол, госцем якога стаў журналіст-фрылансер Антон Сурапін.

Удзельнікі мерапрыемства мелі магчымасць параіцца і паспрачацца наконт сённяшняга падыходу да важкасці працы журналіста, да яго адказнасці перад рэдакцыйным калектывам і чытачом.

Антон Сурапін, які выступіў у якасці «свежай галавы», выказаў свае меркаванні аб інфармацыйным прадукце, што прапануе рэгіянальнаму чытачу рэдакцыйны калектыў. Ён падкрэсліў у газеце не толькі тое, што заслугоўвае павагі да аўтарскай працы, але і падказаў на слабы бок рэдакцыйнай творчасці.

Журналіст-фрылансер падзяліўся сваім вопытам, якім чынам ён імкнецца дасягнуць большых вынікаў, што дапамагае яму быць больш аператыўным ў працы.

Карыснымі, на погляд удзельнікаў круглага стала, былі менавіта дыскусіі пра «дробязі» журналісцкай працы, якія вельмі часта і прымушаюць рабіць высновы, што журналістыка — гэта не проста праца, гэта ўжо вобраз жыцця.

Узаемны абмен думкамі ў нейкай ступені дапамог таксама папоўніць новымі пунктамі перспектыўны план працы рэдакцыі, вызначыць новыя тэмы, найбольш важкія для рэгіянальнага чытача друкаванай версіі газеты і яе сайта.