Замалёўкі з наваколля

Сонца шарам залатым
Святу шчодра свеціць.
Ах, які тут смачны дым
Ноздры сёння цвеліць!

Смажаць мяса. І такі
Пах па парку коціць,
Што аж слінькі пацяклі
Нечакана ў роце.

Водар птушкаю ляціць,
Душу рве на лусты.
Стаць бы, голад наталіць,
Ды ў кішэні пуста.

Што рабіць? Каго пазваць?
Памагчы хто здатны?
Буду дым той смакаваць —
Ён жа тут бясплатны!..

Сяргей Квіткевіч

Кіроўца

За руль садзіцца маладзіца.
На кожным пальцы па пярсцёнку.
Сама сабою ганарыцца,
У тэлефон смяецца звонка…
Ні ўправа не глядзіць, ні ўлева,
Ды цісне ножкаю на газ…
Машына рэзва — трэсь у дрэва!
Народ смяецца: вось дык раз!

Хто там

А на лавачках у скверы
Нехта ноччу спаць кладзецца…
Раніцой вакол паперкі,
Пляшкі ды інтыма смецце…

Валянціна Бабко (Аляшкевіч), Салігорскі раён