Назаву дзіця па-беларуску (11-17 ліпеня)

Прапануем вашай увазе аўтарскі праект случчаніна Сяргея Кіко «Назаву дзіця па-беларуску», у якім ён дае ўласную падборку імён, уласцівых менавіта для Беларусі.

Беларускія імяніны

• 11 ліпеня – Герман, Ян (Ясь), Паўлік, Сяржук.
• 12 ліпеня – Андрусь (Андруш), Пятро, Паўлік, Лявон, Вераніка.
• 13 ліпеня – Сымон, Піліп, Якуб, Міла, Яня (Яніна)
• 14 ліпеня – Пятро, Ангеліна, Алехна.
• 15 ліпеня – Ігнаць, Давыд, Бірута, Бярнат.
• 16 ліпеня – Алесь, Дземід, Стэфан.
• 17 ліпеня – Андруш, Лявон, Ядвіга, Багдан.

Альгерд

Адметнае беларускае імя. Носьбіты гэтага імя вядомыя  з XII стагоддзя. Можна казаць пра яго старажытнае заходне–балцкае  паходжанне, адтуль зыходзіць ягоны сэнс – «слаўны» ці «усімі вядомы».
Існуе меркаванне, што Альгерд – гэта аналаг скандынаўскага імя Хельгі, таксама як і рускае Олег, вымаўлялася раней, як Алехерд і мела іншы сэнс – «прысвечаны багам».
Такое імя меў адзін з самых знакамітых і ўплывовых вялікіх князёў літоўскіх. Ён здабыў для сваёй Айчыны шмат вайсковых перамог і значна пашырыў межы. Часцей менавіта ў яго гонар называлі сваіх дзяцей беларусы.

Знакамітыя землякі

• Альгерд–Якуб Абуховіч  (1840 – 1898 ) – беларускі паэт, перакладчык.
• Альгерд Іванавіч Бахарэвіч (1975, Мінск) – беларускі пісьменнік і перакладчык.
• Альгерд Гедымінавіч (1295 – 1377) – Вялікі князь літоўскі.
• Альгерд Ціханавіч Краўцоў  (1912 – 1993) – маёр, герой  Савецкага Саюза, ветэран Другой сусветнай вайны.