Фестываль вулічнай культуры ў Слуцку

У Слуцку напачатку жніўня пройдзе фестываль вулічнай культуры.

Пра гэта карэспандэнту «IK» паведаміў арганізатар мерапрыемства Аляксей Сяленя.

«У першую чаргу гэта гульні па стрытболу, якія пройдуць у фармаце 3×3 і 1×1. Акрамя гэтага, удзельнікаў і балельшчыкаў турніру чакаюць цікавыя фішкі ад арганізатараў, — кажа Аляксей. — На спартыўнае свята абяцаюць прыехаць ролеры і скейтбардысты. Яны таксама прымуць удзел у фестывалі».

Па словах арганізатара, асноўная мэта правядзення мерапрыемства — гэта актыўны адпачынак. Не проста пакідаць мячык у кальцо, а яшчэ і «памерацца мускуламі» з супернікамі. «Палова ўдзельнікаў - студэнты. Большасць з іх дзесьці трэніруецца. Хтосьці ўваходзіць у зборную па баскетболу БДУ, хтосьці бегае за лінгвістычны ўніверсітэт, хтосьці за свой факультэт у БДУІРы, а хто наогул асвойвае прафесію трэнера па баскетболу», — адзначае случчанін.

Каб прыняць удзел у мерапрыемстве, неабходна адпісаць у адпаведную тэму ў групе ў «УКантакце» (vk.com/stk_streetball).У паведамленні павінны быць указаны назва каманды, калі вы ўдзельнічаеце ў фармаце 3×3, прозвішчы ды імёны — для гульні ў фармаце 1×1.

Вікторыя Капская