Беларускім танцам вучыла школа “Пятровіца”

Вёска Шыпілавічы Любанскага раёна ў сярэдзіне ліпеня стала месцам працы  летняй танцавальнай школы “Пятровіца”.

Яна сабрала больш трох дзесяткаў  аматараў  традыцыйнай  беларускай  народна-бытавой харэаграфіі. І не толькі з нашай краіны: Мінска, Магілёва, Гродна, Любані, але і з Расіі.
“Вучні” – настаўнікі, інжынеры, маркетолагі, прадстаўнікі іншых прафесій — жылі ў  палатачным  гарадку,  які  размясціўся  на адной з вясковых сядзіб. Беларускія народна-бытавыя танцы: “Лявоніха”, “Крыжачок”, “Панначка”, “Гапак”, “Матлёт”, “Кракавяк”, “Падэспань” і іншыя, каб не даймала спёка,  вучыліся скакаць ў Шыпілавіцкім сельскім клубе, дзе было прахладна.
У ролі  галоўнага  настаўніка  выступаў Сяргей  Выскварка, мастацкі кіраўнік узорнага фальклорнага калектыву  “Верабейкі”  Любанскага  цэнтра  культуры. У  пошуках  танцаў  і другой аўтэнтыкі спецыяліст скалясіў раён уздоўж і ўпоперак.

Майстар-клас праводзіла Ларыса  Рыжова, мастацкі кіраўнік ансамбля  “Калыханка”  з  пасёлка  Міханавічы  Мінскага  раёна. Гэты калектыў добра вядомы  ў нашай краіне і за яе межамі. Ларыса Мікалаеўна вучыла не толькі танцам, але і спевам.
Правёў майстар-клас у школе і Мікалай Козенка, вядомы дзеяч культуры нашай краіны, збіральнік, даследчык і папулярызатар беларускай народнай танцавальнай спадчыны,  арганізатар  прэстыжнага  фальклорнага  фестывалю “Берагіня”.

У рамках работы школы ладзіліся  сустрэчы  з  фальклорнымі  калектывамі Любаншчыны. “Вучні”  ўдзельнічалі  ў  святочнай  вечарыне, прысвечанай адкрыццю ганаровага знаку,  які  сведчыць,  што  традыцыйны  спеўны  стыль  вёскі Обчын мае  статус  гісторыка-культурнай  каштоўнасці  РБ. Носьбітам жа таго стылю з’яўляецца мясцовы фальклорны ансамбль “Павалякі”.

Наведаліся  “школьнікі”  таксама  ў  госці да фальклорнага калектыву “Глыбокія крыніцы”  з Закальнога, “Журавушка” з Ямінска, пабывалі ў Ляхаўцы, дзе працуе аматарскае аб’яднанне традыцыйнага хлебапекарства “Кулітка”.  Своеасаблівым экзаменам для “вучняў” быў удзел у рэканструкцыі каляндарна-абрадавага свята “Пятрок”.

Сяргей Любшын

Майстар-клас. Заняткі для “вучняў” школы праводзіў  вядомы айчынны этнахарэограф Мікалай Козенка.