Стогадовы юбіляр жадае беларусам даугалецця

2
Реклама

У Салігорскім раёне пад Новы год шанавалі стогадовага юбіляра — Мікалая Ігнатавіча Дубоўскага, жыхара вёскі Цясова.

Сучасная мясцовая гісторыя помніць, што гэта толькі другі мужчына на Салігоршчыне, які пражыў цэлы век.
Нарадзіўся Мікалай на хутары паміж вёскамі Зажэвічы і Мяцявічы 14 снежня 1910 года ў сям'і селяніна чацвертым дзіцем. Усяго ў сям'і было дзевяць дзяцей.
Доўгажыхар адчувае сябе жвава, любіць пагаварыць. У размове не губляе мыслення. На пытанне карэспандэнта «ІК», што дапамагло яму столькі пражыць, Мікалай Ігнатавіч з усмешкай адказаў: «Прыемная праца на зямлі. Мы не пайшлі ў калгас нават тады, калі забралі хлеў, гумно, кароў і коней. Елі бацвінне, крапіву, запівалі крынічнай вадою і дыхалі чыстым паветрам. Было цяжка, але ж вытрымалі ўсё.
Калі прыйшоў час, пайшоў служыць у армію. У 1941 годзе пад Смаленскам трапіў у палон да немцаў.
Трымалі мяне ў Барысаве, ганялі кожны дзень на цяжкую працу. Са мною быў побач немец савецкі з Паволжа, добра разумеў нямецкую мову.
Аднойчы ён падслухаў размову немцаў-ахоўнікоў, якія гаварылі, што ў лесе вакол партызаны. У 1942 годзе мы з земляком уцяклі з лагера. Вярнуўся дамоў на бацькаў хутар, стаў працаваць на зямлі. У 1944 годзе зноў забралі ў армію. Для мяне вайна скончылася пад Кенігсбергам. Вярнуўся дамоў на бацькаў хутар у 1946 годзе. У 1948 ажаніўся, маю 5 сыноў, 3 дачкі, 15 унукаў, 21 праўнука. Нас сёння цэлы батальён.
У 1968 годзе „Беларуськалій“ перасяліў мяне з хутара ў вёску Цясова. З таго часу я лічыўся калгаснікам, быў вартаўніком у мясцовай гаспадарцы. Дзякуй дачцэ і зяцю, якія пакінулі горад і дапамагаюць мне цяпер жыць».
Доўгажыхар паказаў медаль, якім узнагародзілі яго ўнукі. Выраблены з бронзы, медаль важыў не меней кіло.
«Павышаных абавязкаў на сябе не бяру, але хочацца яшчэ пажыць. Жадаю ўсім беларусам доўгалецця», — адзначыў Мікалай Ігнатавіч Дубоўскі.
Па дадзеных Салігорскага райвыканкама, сёння на тэрыторыі раёна пражывае 230 доўгажыхароў, якія пражылі 90 гадоў і больш.

Уладзімір Амяльчэня

Фота: Уладзімір Амяльчэня

Реклама

ДОЎГАЖЫХАР. Мікалай Ігнатавіч Дубоўскі (у цэнтры) з зяцем Мікалаем і старэйшай дачкой Валянцінай.

Реклама