Культура

Дэпутат Алена Анісім: Моладзь заганяюць у кватэры

Вікторыя Капская | 10 августа 2017 в 09:37
Фота: Вікторыя Капская

У пятніцу, 4 жніўня, у Слуцк завітала Алена Анісім, дэпутат парламента. У якасці намесніка старшыні рэспубліканскага Таварыства беларускай мовы яна прысутнічала на справаздачна-выбарным сходзе Слуцкай суполкі ТБМ, распавяла аб накірунках дзейнасці галаўной арганізацыі і пажадала поспехаў у працы па беларусізацыі Слуцка новаабранай гарадской Радзе.

«Кур’ер» скарыстаўся магчымасцю і задаў госці некалькі пытанняў па яе сферы дзейнасці ў парламенце — адукацыі і культуры.

Закрыццё школ у вёсках

У размове з дэпутатам «Кур’ер» прывёў прыклад закрыцця базавай школы ў Навадворцах і пацікавіўся, як яна ставіцца да гэтага.

Алена Анісім лічыць, што закрыццё сельскіх школ — вялікая праблема. «Па-першае, сельскія школы — гэта беларускамоўныя школы. Пасля закрыцця такіх устаноў дзеці часцей за ўсё працягваюць вучобу ў рускамоўнай школе, — кажа суразмоўца. — Праб­лема ў тым, што дзецям цяжка перастроіцца».

Калі школу закрываюць, навучэнцам прапануюць хадзіць ці ездзіць вучыцца ў суседнюю вёску альбо ў горад, калі ён недалёка. Аддаленасць школы — другая праблема, якую называе дэпутат Алена Анісім. Бацькам прыходзіцца шукаць варыянты, як дастаўляць дзяцей у навучальную ўстанову.

Трэці момант — эканаміч­ны. Некаторыя вёскі вымі­раюць, таму і дзяцей у класах мала, а ўтрым­лі­ваць школу з малалікімі класамі — дзяржаве нявыгадна.

Бар’ер грамадзянскім ініцыятывам

«Кур’ер» увёў Алену Анісім у курс справы, як ідзе культурнае жыццё ў Слуцку. Расказаў аб закрыцці опэн-эйра, пра забарону беларускамоўнай вечарыны і гэтак далей.

Дэпутат адзначыла, што, калі актывісты хочуць правесці мерапрыемства ў Слуцку, а мясцовыя ўлады не дазваляюць, ім трэба пастаянна весці дыялог з уладамі і аргументаваць свае просьбы.

«Я не ведаю ўсіх праблем Случчыны і ў чым прычына такой сітуацыі. Скажу, што добра, калі ёсць пазітыўна актыўная моладзь, яна — наш заўтрашні дзень. Доб­ра, што яна гатова браць на сябе адказнасць і нешта арганізоўваць. У гэтым сіла грамадства. Без яе актыўнай часткі нельга рабіць добрае і карыснае», — кажа палітычны дзеяч.

Перайменаванне вуліцы

Выбор редакции

На думку дэпутата, каб перайменаваць вуліцу ў гонар слуцкіх паўстанцаў, трэба правесці інфармацыйную кампанію: хто гэтыя героі, чаго яны хацелі дамагчыся, за што змагаліся.

Яна лічыць, што можна прыйсці да кампрамісу. Напрыклад, назваць у гонар слуцкіх паўстанцаў новую вуліцу або новы мікрараён.

Тры праблемы маленькіх гарадоў

Алена Анісім першай з праблем малых гарадоў называе рашэнне аб пераносе пачатку заняткаў у школах. «У колькі гадзін пачынаць заняткі ў школе, павінен вырашаць дырэктар, педагагічны савет і бацькоўскі сход, а не «наверсе і гвалтам», — лічыць яна.

Другая праблема — шмат функцый у педагогаў, акрамя адной — адукацыйнай. «Хадзіць па кватэрах і правяраць, ці ёсць пажарныя апавяшчальнікі, як жывуць дзеці ў сем’ях і гэтак далей, — не задача педагогаў», — упэўнена Алена Анісім.

Трэцяя — «каменданцкая гадзіна» на дыскатэках. «Калі я гадавалася, у вёсках не было праблем з дыскатэкамі. Школьнікі, напэўна, за поўнач гулялі. У гэтым сэнсе сітуацыя зараз стала горшай. Моладзь заганяюць у свае кватэры. З гэтага можа вырасці праблема адаптацыі з іншымі людзьмі, у тым ліку і пры стварэнні сям’і ў будучыні», — лічыць суразмоўца.

Этот материал был опубликован на странице 11 печатного номера газеты «Інфа-Кур’ер» №32 (862) от 10 августа 2017 года.
Самое популярное
Все публикации